நடிகர் திலகம் சிவாஜி கணேசன் உலகத் தமிழர்களின் அடையாளம்

"...என்னுடைய வாழ்க்கை ஒரு திறந்த புத்தகம். அனைத்து மக்கள் மனதிலும் நிரந்தரமாக, ஒரு 'நடிகனாக' இருப்பவன் நான். எல்லோருக்கும் என்னைப் பற்றி நன்றாகத் தெரியும். நான் சிறு வயது முதற்கொண்டே நடிக்க ஆரம்பித்தேன். சினிமா உலகத்தில் நான் நடிக்க ஆரம்பித்த பிறகு, என்னைப் பற்றிய குறிப்புகள் பல, புத்தகங்கள் வாயிலாகவும் பத்திரிகை வாயிலாகவும், சிறப்பு மலர்கள் மூலமாகவும், செய்திகளாகவும், விமர்சனங்களாகவும், பல்வேறு காலக் கட்டங்களில் வெளிவந்திருக்கின்றன. அவற்றில் சிலவற்றில் என்னைப் பற்றி உயர்த்தி சொல்லப் பட்டிருக்கலாம். சிலவற்றில் குறைத்துச் சொல்லப் பட்டிருக்கலாம். ஒரு சிலவற்றில் நிறைவானதாகக் குறிப்பிடப் பட்டிருக்கலாம்.
வேறு சிலவற்றில் சொல்லப் பட்டவை பொருத்தமற்றதாகக்கூட இருக்கலாம். ஏன், ஒரு சில செய்திகள், உண்மைக்குப் புறம்பானதாகக்கூட இருக்கலாம். இவற்றிற்கெல்லாம் அந்தக் காலத்தில், அந்த சமயத்தில், பதில் சொல்ல, எனக்கு நேரமும் காலமும் கிடையாது. அதற்கெல்லாம் தற்பொழுது பதில் சொல்ல வேண்டிய நிர்ப்பந்தமும் எனக்கு இல்லை. இருந்தாலும், எனது வாழ்க்கையின் உண்மைச் சம்பவங்களை உங்களிடம் சொல்கிறேன். அதன் மூலம், சரியான விஷயத்தை மக்கள் தெரிந்து கொள்ளட்டும்."